Halil Dalkılıç: Rojava ne Afganîstan e! 

Bûyer û pêkhateyên li Afganîstanê rojeva siyasî ya navnetewî dagirtiye. Berdevkên dewletên serdest bi daxuyaniyên ku dikin, bi hişê mirovan dilîzin. Berdevkên Amerîkayê û ên Yekîtiya Ewropayê hê jî tu daxuyaniyeke ku meriv bi teslîmkirina wan a Afganîstanê  îkna bibe, nekirine. Ji xwe berdevkên Rûsyayê rêxistina cîhadîst Talîbanê wekî hêzeke nerm û meşrû nîşan didin. Çînê hê jî dengê xwe ji Talîbanê re zêde bilind nekiriye.  

Hêzên navdewletî yên ku tilîya tevan di pêkhatina rewşa îroyîn a hilweşiyayî ya Afganîstanê de heye, heta îro nerazîbûneke aşkere û tund li dijî serwerbûna Talîbanê nîşan nedane.  

Meriv wer difikirî ku qey tenê Erdogan û berdevkên hikûmeta Tirkiyê bi daxuyaniyên derew û bêmentiq bi hişê xelkê dilîzin. Lê wer xuya ye; ku ev siyaseteke giştî a serdestan e. Berdevkên dewletên bihêz ên wekî Amerîka, Rûsya û endamên Yekîtiya Ewropayê jî di derbarê rewşa dawî ya Afganîstanê de wekî mirovahiyê bêaqil û bêfam bibînin, daxuyaniyên pûç û vala didin…  

Wekî nûnereke Komaleya Jinên Şoreşger ên Afganîstanê (RAWA) jî gotiye, “Amerîkayê Afganîstan di sêniya zêrîn de teslîmî Talîbanê kir.“  

Hêzên navdewletî siyaseteke wer bi rê ve dibin, ku di pêşiyê de bi gotinên xwe hêviya xelkên di bin rejîm û rêxistinên zordest de bi xwe ve girê didin, lê paşê wê hêviyê bi xwe pûç û vala dikin. Xelkan bi êşên hên girantir re rû bi rû dihêlin û vegotinên wan ên wekî ‘demokrasî‘, ‘mafên mirovan‘, ‘azadî‘ û ‘aramî‘ jî mîna çîrokên bêwate dikevin ber bayê û vedimirin.   

Rojnamevanê Afganîstanî Ahmed Kazimî jî pêşketinan wekî ku herkes wer fam dike, dibêje; “Amerikayê bi xwe bingeha hikûmeta Afganîstanê vala kir û rewş ji bo serkeftina Talîbanê re amade kir.“   

Serokê Amerîkayê Joe Biden biryara vekişîna leşkerên xwe ji Afganîstanê parast û ji bo vekişînê sedemekî balkêş nîşan da. Biden got; „ku armanca Amerîkayê li Afganîstanê avakirina neteweyekê nîn e û ji ber ku hêzên leşkerî yên Afganîstanê ji bo welatê xwe şer nakin. Di rewşeke wisa de ew hewce nabînin ku leşkerên Amerîkayê ji bo vê yekê şer bikin.“    

Gotinên Joe Bidenî yên li ser rewşa Afganîstanê û peşketinê li wir, bala mirov vedigerîne ser rewşa rojavayê Kurdistanê. Mixabin siyaseta Amerîkayê ya li Rojava jî şêlû ye û hêviyeke zelal nade Kurdan… 

Amerîka û hevkarên wê yên NATOyê li Rojava siyeseteke wer bi rê ve dibin, ku dixwazin hêviya xelkê bi xwe ve girê bidin. Lê ji ber daxwaziya Tirkiyê, piştgiriyê nadin xebatên sivîl ên ji bo avakirina rejîmeke sivîl û herwiha di qadê dîplomasiyê de deriyekî dîplomatîk ê ku civaka Rojava xwe pê îfade bike, venakin… 

Tirkiyê jî helwesta dewletên serdest wekî firsendekî mezin bikar tîne û êrîşên li dijî Kurdan bênavber dewam dike. Tenê di çend rojên vê dawiyê de li Şengalê û li Rojava li pêş çavên cîhanê, bi bombekirina nexweşxaneyekê û çend cihên din ji 10î zêdetir Kurdên sivîl û çend endamên hêzên leşkerî ji hêla arteşa Tirkiyê ve hatin kuştin.  

Amerîka û Yekîtiya Ewropayê li dijî Talîbana cîhadîst şer kirin, lê bi salane bi wan re li dora maseyên dîplomasiyê dicivin û wan meşrû dikin. Mixabin heman Amerîka û heman Yekîtiya Ewropayê bi Kurdên Rojava re li dijî cîhadîstên DAÎŞî şer dikin, lê hê jî Kurd nêzikî maseyeke dîplomasiyê nekirine!. 

Ji hevkarên nejidil durûtiyeke neexlaqî li dar e. 

Di bin metirsî û êrîşên Tirkiyê û DAÎŞê de tim bê astengkirin jî, li rojavayê Kurdistanê him hewldaneke bi hişmendiya laîk birêxistinîkirina civakeke demokratîk heye û him jî hêzeke leşkerî ya ku ji bo parastina xelkê û axa xwe li ber xwe dide û li hemberî DAÎŞê bi hêzên navnetewî re hevkariyê dike, heye. 

Kurdan bi têkoşîna xwe destketinên heyî bidest xistin. Him jiyanê ava dikin û him jî xwe diparêzin. Rewş hê jî tijî metirsî, xem û guman be jî, Rojava ne wekî Afganîstanê ye!..  

İlginizi çekebilir